“Se, der kommer far!”

Då eg var lita jente hadde vi ein reproduksjon av eit maleri heime som gjorde umåteleg stort inntrykk på meg. Mange hugsar sikkert “Se, der kommer far!” av Marie Hauge. Eg sat i sofaen og kika på biletet, dikta opp ei historie rundt og tenkte mykje på desse fire borna som hadde venta slik på pappaen sin.

Skal tru kva dei tenkte? Skal tru kor lenge dei hadde venta på han? Skal tru kvar han hadde vore? Spørsmåla mine var mange og eg storkosa meg med å sitte slik å drøyme meg vekk!

Pappaen her i huset har jobba mykje i sommar, og det er ikkje fritt for at ungane har lengta etter han… Siste vekene har han vore på Bjorli og jobba, og gleda var stor den dagen vi venta han heim.

Minstesnuppa stilte seg opp i vindaugskarmen og kika etter han, og då fekk eg assosiasjonar til biletet eg hugsar så godt frå barndomen…

Nybada og med nyepysjen på stod ho slik og venta… Skal tru kva ho tenkte, der ho stod?

"No kjem ferjekøa, mamma!”, seier ho, og veit at pappa ikkje er langt unna. Etter ei stund med småtripping høyrer ho endeleg at bilen kjem…

Ho kunne ikkje kome seg fort nok ned frå bordet ho stod på!!! “Sjå, no kjem pappa!”, ropte ho høgt og sprang ut i gangen for å ta hjarteleg i mot han!

Pappaen på Marie Hauge sitt maleri kom heilt sikkert ikkje med bil i ei ferjekø, men han hadde heilt sikkert lengta etter ungane sine, og fekk heilt sikkert ein like hjarteleg velkomst som vår pappa! Sjølv om det kanskje skil 150 år mellom desse to situasjonane, er det nokre ting som aldri endrar seg….

♥♥♥

…ein pappa er alltid velkomen heim!!!

PS! Etter den overveldande velkomsten stod papsen på kjøkenet og varma seg litt mat, medan minstesnuppa snara rundt han. Brått kom ho inn på stova til meg:  ‎"Mamma, ej skal feire bryllaupsfest", seier 3-åringen! Eg lurer på kven ho skal gifte seg med. "Ej skal gifte mej med han pappa!", seier ho med den største sjølvfølge. "Men ej e gift med mamma di", seier han. "Åh, så bra! For ej heite mamma og då kan vi gifte oss likevel!!!". Seansen vart etterfulgt av bryllaupsvals på stovegolvet...♥♥♥

Etterlengta butikk!!!

Eg gjekk i fleire veker og venta på at Helle og Hege skulle fjerne gråpapiret i butikkvindauga sine!!! Dei har nemleg starta interiørbutikk i den flotte gågata i Ørsta!

Då dei opna dørene på måndag var eg sjølvsagt på plass! Dette er ein snopebutikk for alle interiørglade som likar den franske landstilen, men også for dei som er litt nostalgiske av seg! Eg har tatt ein del bileter i butikken og har fått lov av dei flotte damene til å publisere dei på bloggen min!

For dei som lurer på kvar “Landhandelen” ligg, så lyt dei ta turen til Ørsta og ta seg ein rusletur i gågata. Lengst ute i gata ligg denne koslege butikken, nokre få steg frå den populære kaffibaren Fugl Føniks og haldeplassen.

Dei har klart å lage eit godt miljø i butikken og ein kan sanneleg drøyme seg vekk….

Butikken har varer for ein kvar smak og til eit kvart bruk.

Desse glasa kunne eg godt ha tenkt meg å ha…

Her kan du kjøpe nips og naps, eller flotte møblar.

Eg likte meg så godt bort i denne kroken. Det skjønar du sikkert… Sjå den lekre tapeten!!!

Mykje fint å pynte med i heimen!

Eg kjem til å legge ut fleire bileter frå butikken i bloggen i seinare innlegg! Det er så mykje fint å finne i “Landhandelen”!!!

Ivar Aasen har rett – som alltid – for på “Landhandelen” finn ein absolutt det ein leitar etter og mykje, mykje meir!

Eg håper verkeleg at folk valfartar til Hege og Helle sin butikk! Ikkje berre bidreg dei til å puste liv i ei gate som mange butikkar har flytta i frå, men dei fyller eit interiørtomrom for oss som er glade i denne stilen.

Tusen takk til “Landhandel”-damene! Eg kjem nok til å verte ein av dei faste kundane….

Medan brøddeigen hevar seg…

…og minstesnuppa søv, står klesvasken lydig og ventar i stampen sin slik at husfrua får nyte ein herleg kvardagslunsj!

Alle leikene på golvet ventar på opprydding. Snart! Eg skal gjere det snart! Må berre nyte litt til…

Ingen av desse daglege gjeremåla forsvinn, men det kan nemleg skje med gylne jordbæraugneblink! Nokon kan ete opp jordbæra utan at eg veit det, telefonen kan ringje eller så må ungane køyrast og hentast her eller der! Men akkurat no er det stille. Dørgande stille. Endåtil hunden ligg rett ut med beina til vèrs og nyt stunda.

Så utan at nokon veit det og kan klandre meg for det, unner eg meg eit lite friminutt og let resten av verda segle sin eigen sjø! Eg har sikkert godt av det, trur du ikkje???

Kva gjer du når du unner

deg eit friminutt???

PS! Jordbæra er smakssette med Bodil sitt herlege, heimelaga sitronsukker!!! Det er å få kjøpt på Nilsbuda på Sæbø i Ørsta kommune! Dersom du er i nærleiken burde du sikre deg ein smak av dette….

Pink dreams…

Treåringen min elskar rosa og Madicken. “Mamma, eg vil ha ein slik kjole!”, seier ho når Madicken og Elisabeth spring berrføtt i graset på Junibakken.

Av og til er ikkje draumane så langt unna. Snille Anita skulle til Langevåg på handel og tok turen innom Emmas Verden. Eg visste dei hadde “Junibakken”-pysjar på salg og ba fint om ho kunne kjøpe to til meg…

Det var så herleg å opne papirposen og ta ut dei to pysjane. Posen var pynta for hand, med utklipt hjarte og vakker handskrift. Og dei skjønne pysjane var fint bretta med raudruta sløyfe rundt.

Det er så kjekt når nokon har gjort seg  flid for at vi som kundar skal få “det lille ekstra”!

Eg trur nok treåringen blir veldig glad når ho får sjå desse rosa draumane i morgon! Ho kjem til å ta dei på seg og trippe rundt i stova og leike at ho er Madicken. Så kjem ho til å setje seg i sofaen og sjå Madicken på film, medan eg sit ved sidan av med smil i augene og kjenner at hjartet er varmt!

♥♥♥

Tusen takk til Anita som var så snill å handle for oss – og tusen takk til Emmas verden som har så gode tilbod, så flotte varer og som held oss oppdatert på bloggen sin!

Det er helg…

…og eg pakkar ungane i bilen og set kursen mot fjellheimen! Vi har lengta etter papsen som er vekk og jobbar – no skal han få ♥-lig besøk av oss!!!

Håper helga di vert full av sol, bading, is, blomebinding, humler som surrar, seine kveldar i godt lag, ungar som kvin av fryd og vaksne som veit å setje pris på alle desse gullkanta augneblinka!

♥♥♥

Vi skal kose oss masse og vere ilag med nære og kjære!!!

(denne norske karen var så snill å låne meg biletet sitt)

Coming to a Theatre Near You…

Vi er så heldige å ha vår eiga underhaldningsavdeling i heimen vår. I går var det danseshow, teater og moteshow som stod på programmet.

Minstesnuppa stod for det meste av underhaldninga og svinga seg i eine kjolen etter den andre. Songane som stod på repertoaret varierte frå Abba  sine kjende slagerar til Beyonce sin “Single ladies”.

Litt trøbbel med kjolen, men det opplever vel mange modellar under motevisningar!!! Ho har likevel forstått at uansett kva som skjer, så må ho gjennomføre med full overbevisning!

Avslutningsnummeret i minstesnuppa sin konsert var “Mamma Mia”, som nok er ein av favorittsongane hennar!

Frøken midtimellom hadde ei svært så teatralsk framsyning i William Shakespeare si ånd, noko som vekte stor begeistring blant tilskuarane!

Etter endt forestilling måtte sjølvsagt dei involverte partane fram på den heimesnikra scena for å hauste applaus! Eldstemann var altmuligmann og hadde tallause oppdrag for dei krevjande aktørane. Han var ei viktig brikke i alle nummera og fekk stor takk frå minstesystrene!

♥♥♥

Takksame foreldre var rause med applausen og gler seg allereie til neste framsyning!

Personleg almanakk? Ja takk!!!

Som lærar er ein nøydd å halde orden på dagar og veker, karakterar, vurderingar, møter og mykje meir. Ei bok til å putte alle desse opplysningane i er absolutt naudsynt!

Forrige skuleår hadde eg ei stor, svart bok i A4-storleik. Der var god plass til skrive og tilpassa lærarar. Men du verden så ; upraktisk… Ikkje fekk eg den i veska mi, den var tung, den var vanskeleg å finne fram i og sist, men ikkje minst; den var kjedeleg og trist.

No var eg budd på å bruke sommaren til å tråle butikkane etter den rette almanakken! Ein liten sveip innom denne koselege bloggen ein sein kveldstime sparte meg den jobben! Ho fortalte nemleg om det svenske firmaet “Personleg almanacka”. Både bileta av dei ulike almanakkane og konseptet vann meg øyeblikkeleg!

Her kan du gå inn og designe dei heilt personlege almanakk!!! Det var superenkelt å gjere det, og veldig mange artige val du kunne gjere! Eg sende bestilling, betalte online og så var det berre å vente. På ordren stod det at det kunne ta to veker før eg fekk den i posten, men allereie etter ei veke låg den i postkassa mi!

Samanlikna med kva det kostar for andre almanakkar, så er prisen slettes ikkje avskrekkande. Eg betalte i underkant av 300,- og det inkluderte frakt og nokre ekstra duppedingsar som linjal, plastlommer o.l.

 

Desse bileta er brukt  med løyve frå “Personlig almanacka”. Eg vil anbefale desse herlege almanakkane til alle som enno ikkje har funne seg almanakk til hausten! Dei kan bestillast i tre ulike storleikar.

Eg er i alle fall klar til nytt skuleår!!!

Gardsbesøk!!!

I dag har vi besøkt Erdal gard, ein besøksgard ikkje så langt frå der vi bur! Dei to eldste gledde seg til å sjå alle dei spennande dyra…

…medan minstesnuppa gledde seg aller mest til å treffe att bestevenninna frå barnehagen, som er så heldig at ho bur på denne garden! Gjensynsgleda var stor for begge jentene!

Dei små kyllingane klarte å sjarmere oss i senk, og eldstemann har no store planar om å starte opp att med høns her på garden!!!

Ei moskusand som bada i ein sinkbalje fekk litt ekstra pleie denne dagen! Minstesnuppa og bestevenninna skrubba henne på ryggen med ein kost, og det såg jammen ut til at ho likte det!

Som seg hør og bør når nokon har bada, måtte baljen skrubbast skikkeleg! Minstesnuppa gjekk laust med kosten og jobba hardt for å gjere reint! Eg er sikker på moskusendene sette pris på ekstra service!

Der var forsyne meg ei lita klatremus på garden òg!!!

Vi storkosa oss i det nydlege sommarvèret denne julidagen, og vil absolutt oppmode alle om å ta turen til Erdalen gard på besøk! Link til Facebook-sida deira finn du her.

Tusen takk for oss – vi kjem tilbake!!!

Måneskin ♥ ♥ ♥

Den nydlegaste månen lyser opp natta mi…♥ ♥ ♥

Kven kan vel leggje seg

når ein har noko så vakkert å sjå på???

Kjære du….

…som rotar i fjøra vår: kan du vær så snill å rydde etter deg neste gong??? Dette gjeld forøvrig alle som rotar i alle andre fjører òg!!! I dag gjekk det hardt utover ei lita, berrføtt jente som skar seg på glasbrot. Sjølv om vi plukka opp alt vi såg, låg der glasbrot og lurte under steinane og sanden.

Fjøra vår ligg slik til at det er lett å nå den for alle – heldigvis! Det er kjekt når mange nyttar seg av fjørelivets gleder. Vi ser rett ned i støda vår frå stoveglaset, og i løpet av sommaren er det mange som er der i seine kveldstimar og brenn bål og kosar seg.

Det er berre så dumt at ein absolutt må rote så mykje! Ein skulle tru det var ei smal sak å rydde etter seg! Og kvifor i alle dagar må ein absolutt knuse glasflaskene etter at ein har tømt dei???

Det er også lov å rydde opp eingongsgrillar, plastposar, ketchupflasker og ølboksar. Please….

Vi blir så glade når vi ser at folk kosar seg i fjøra vår, men vi blir like lei oss kvar gong vi ser at dei ikkje ryddar etter seg…

I dag fekk vi endeleg sol på Sunnmøre og dagen vart tilbragt i fjøresteinane. Noko som resulterte i at minstesnuppa skar seg på glasbrot to gongar; eit djupt kutt på lissjetåa og eit kutt på hælen. Eg tok sjølvsagt ikkje bilete av såra og alt blodet, men lånte heller dette biletet av denne fotokunstnaren.

“Frå alle sår kjem det eit arr, og alle arr fortel ei historie. Ei historie som fortel at eg overlevde”.

Jaudå, minstesnuppa overlever nok desse såra. La oss berre håpe at alle som er glade i å bruke den flotte naturen vår også har vit til å rydde etter seg!

Det var dagens peikefinger, folkens…..

Kan hende…

…vi snart får ein varm og deilig sommarkveld, og eg kan ta med meg gode vener og min aller kjæraste ein tur i fjøra eller på stranda. Kan hende vi kan fyre opp bål og småprate til langt ut i dei små timar, medan sola går ned i havet og månen lyser opp kvelden for oss.

Kan hende vi kan nippe til litt raudt i glaset og ete små godbitar. Kan hende vi avsluttar det heile med raude jordbær og eit svalande nattbad!

♥ ♥ ♥

Kan nokon sende meg litt sol og varme slik at vi får ein slik kveld snart???

Med liv og lyst og sand…

Sommaren på Sunnmøre har ikkje akkurat vore lystig og varm, og då er det om å gjere å kapre dei få fine augneblinka ein har og leve lenge på dei!

Nok ein gong viser eg bileter frå vakre Flø! Ungane kosa seg og fann alt mogleg rart i sanden! Slik som denne kvisten!

Eller denne!!! Vi trudde faktisk det var ein slange, men ved nærare ettersyn såg vi heldigvis at det var feil…

Så utruleg spennande å leike seg i bølgene!

Å springe i frå bølgene var superkjekt!

Frøken midtimellom fann seg ein stein og heldt eit lite “one woman”-show for oss! Kva ho song er vi ikkje så sikre på, men underhaldande var det i allefall!!!

Minstesnuppa måtte sjølvsagt også opp på steinen og underhalde litt!!!

Turen til Flø slutta slik turar til Flø alltid gjer; vill leik i sand! Då er det sjølvsagt berre ein ting å gjere; BADE!!! Eg kan love deg at det er kaldt når storhavet slår bølgene inn over stranda, men bade måtte dei!!!! Eldstemann grudde seg litt, men det var berre smil å sjå då dei kava rundt i bølgene!

♥ ♥ ♥

Det var sein kveld då vi sette oss i bilen heim. Vi hadde fått ein smak av sommar og var godt nøgde alle mann…

Slike minner lever vi lenge på!!!

Til dei som måtte lure på om det ikkje burde kome eit interiørinnlegg snart, og som er lei av alle sommarbileta mine, les følgande beskjed: Vi er minst mogleg inne, kjøper minst mogleg av nye ting og tang og prioriterer å prise sommargledene og ikkje nips og naps!  Men eg kjem sterkare tilbake – før du veit ordet av det!