Jordbærdraum...

I kveld måtte eg feire at eg er ferdig med 17. mai-talen eg skal halde, så då har vi tjuvstarta litt på 17. mai-desserten! Oppskrifta er utruleg enkel, men smaken er heilt ubeskriveleg!

Du treng ei korg med jordbær som du skyl godt og deler i fire. Legg dei i ei skål.

Så treng du ein lime. Den vaskar du godt.

Rasp skalet og ha over jordbæra. Deretter pressar du ut safta slik at den marinerer jordbæra.

Strø over ei skei med sukker (to skeier om du er redd det blir for surt). Skrap ei vaniljestang og legg til sides frøa, dei skal du bruke i kremen du lagar til slutt. Den utskrapa stanga legg du i ilag med bæra. La stå å trekke i 20 minutt.

Den gode kremen til å ha på toppen lagar du slik: ta eit beger seterrømme og ha i ein bolle (det MÅ vere seter-varianten, ja...). Tilsett frøa frå vaniljestanga og ca ei ts-1 ss sukker. Så tek du handmiksaren og piskar til det får same konsistens som piska kremfløte. Tilsett nokre dråpar lime og bland med ei skei.

 

Fordel litt  på toppen av jordbæra, pynt gjerne med noko grønt om du har. Eg brukte basilikum, som visst nok skal vere det siste hotte på "kva tilbehør passar til jordbær"-fronten. Det funkar sjølvsagt like bra med sitronmelisse, mynte, ein liten fiol, eller andre ting du måtte ha for handa.

Til denne desserten passar det godt med litt sprudlande i glaset. I lag med ungar er det sjølvsagt brus i glaset!

Vi brukte ein iskald, tysk musserande vin som heiter Saracco (2008) Moscato D`Asti. Den passa perfekt til limesmaken og jordbæra.

Vil absolutt anbefale denne desserten til 17. mai, eller som avslutning på eit deilig grillmåltid!

VELBEKOMME!