Du blir vel med på feiringa?

Det er ikkje utan grunn at eg har lært meg nokre nye fotoredigeringsferdigheiter, og flikka og pussa litt opp på bloggen min siste tida. Det er nemleg jubileum på gong!

For eitt år sidan sat eg i ei januarmørk stove og las bloggen til ei god venninne på Eidsvoll. Ho hadde sendt meg ei tekstmelding med link til ei adresse på nett, og eg sat lenge og beundra den flotte "heimesida" hennar.

Eit lite frø vart sådd, og tanken om å lage ein eigen blogg klarte ikkje å sleppe taket. Eg var heimevèrande med lissjesnuppa vår og hadde behov for ein kreativ arena. Kanskje dette kunne vere noko?

20. januar 2008 såg bloggen min dagens lys. Eg hadde inga formeining om kva det skulle verte av den og korleis eg ville forme innhaldet. Heldigvis kom det av seg sjølv! Eg skreiv små anekdoter, forteljingar og la ut biletar frå kvardagen vår. Det var ikkje så mange som var inne og kommenterte, men alle dei fantastiske attendemeldingane eg fekk frå folk rundt omkring fortalde meg at det var mange som var inne og las det eg skreiv. Dette gav meg energi til å halde fram, og i slutten av juli la eg ein teljar inn på sida mi.

 

I løpet av året som har gått har eg skrive 298 innlegg, fått 30 ulike utmerkingar, stifta mange nye og fantastiske bekjentskap og sidan juli -08 har eg hatt nesten 50 000 besøk på bloggen min. For ikkje å snakke om all inspirasjonen eg har fått! Det gir meg stor glede når eg tenkjer tilbake på kva bloggåret 2008 har gitt meg.

Eg er glad for å ha fått så mykje tilbake frå blogginga mi. Likevel så er det kanskje håpet om å ha gitt noko til andre, som har halde drivkrafta mi oppe. Kanskje har eg planta nokre tankar hos andre som dei ikkje hadde før? Kanskje har eg fått trøysta, gleda og inspirert andre - for meg er det det største av alt!

No håper eg du vil vere med og feire jubileumet mitt! Bloggen min er ein kvardagsleg og enkel arena, der dei små augeblikka har stått i fokus. Som mange har fått med seg, er eg oppteken av å sjå det store i det små - å kunne glede seg over det enkle. Eg er overtydd om at vi alle får eit rikare liv om vi berre klarer å verte flinkare til å verdsette det enkle!

Alle som legg att kommentar på dette innlegget fram til midnatt 20. januar, vil vere med i trekninga av to flotte premiar! Både bloggarar, blogglause og anonyme kan vere med (dei anonyme må sjølvsagt legge at namnet sitt). Eg hadde vorte ekstra glad om alle dei gode og blogglause vennninnene mine, som eg veit er trufaste lesarar av bloggen min, hadde lagt att ein kommentar (hm, nokon som tek hintet...???)!

Oppgåva er enkel (trur endåtil eg har hatt ei slik oppgåve før...):

Skriv litt om kva slags kvardagsaugeblikk som berikar kvardagen din - så enkelt er det!

Premiane er to bøker som eg trur kan vere med på å utvide mange sin horisont:

Dette er ei rykande fersk bok med dikt og foto av Turid Skjelten frå Brattvåg. Ho har boklansering og sleppfest i dag, og eg ringte henne i dag for å bestille ei bok til utlodning på bloggen min! Tekstene handlar om det som skjer mellom og i mennesker, det som ikkje i første omgang er beviseleg og handfast. Boka er både ei mental og visuell reise i kjensler  og stemningar (både bilete og fakta om boka er hente frå heimesida til Turid, som du kan finne her). Denne har du vel lyst på???

(foto av omslag er henta frå Kolon Forlag, Gunnhild er fotografert av Magne Sandnes)

Denne boka er skriven av Gunnhild Øyehaug som kjem frå heimkommunen min. Dette skriv Kolon Forlag om boka: "Vente, blinke er ein roman med fleire historier. Vi møter den unge og noko forknytte litteraturstudenten Sigrid og hennar skjelsettande møte med forfattaren Kåre, filmregissøren Linnea som skal på locationjakt i København, performancekunstnaren Trine som slit med mjølkespreng, og ikkje minst Viggo, nok ein litteraturstudent, som lengtar inderleg etter å høyre saman med nokon eller noko. Fiskehandlardattera Elida, filmprodusenten Robert og litteraturprofessoren Göran spelar også sine roller i denne bunten av skjelvande og tidvis desperate karakterar.
Gunnhild Øyehaugs roman er både brei og kompleks. Ho er ein leikande og sprelsk forfattar, og Vente, blinke er både humoristisk og djuptloddande. Dette er ein roman om drift og draumar, kvinner og menn, om kjærleik og om kva det vil seie å våge å vere seg sjølv."

Alt du treng å gjere for å vinne ei av desse bøkene er å legge att ein kommentar under dette innlegget. Du må gjerne kopiere ein av jubileumstulipanane mine og legge på din blogg for å gjere andre merksame på jubileumet og dei flotte premiane dei kan vere med på å vinne!

Eg blir sjølvsagt kjempeglad om mange blir med på feiringa!