STRESSA?????? Nei, langt ifrå...

Vi mødre likar å ha det meste under kontroll. Når heile familien skal avgarde, har vi det med å ha lange lister inn i hovudet vårt over alt som må gjerast, i kva rekkjefølge det skal utførast og til kva klokkeslett dei ulike gjeremåla må vere ferdig utført. Eg er litt den typen, og tek det som ei sjølvfølge at husbonden har fullt innblikk i planane mine.

Då kan mykje gå gale. Som i går, då vi skulle gjere oss klare til konfirmasjonsselskap.

 

Vi skulle vere i selskapet klokka fem, så eg hadde planlagt at husbonden og ungane skulle gå på badet klokka fire. Dei skulle så smått byrje å gjere seg klare, medan eg ordna med gåver og kort til konfirmanten. Klokka kvart over fire gjekk eg opp på badet, og forventa å sjå at alle stod reine og fine - klar til å få på seg finstasen (det er sjølvsagt mor som må ordne med slikt, så pass kjolen blir rett veg, skjorta er fint stappa ned i buksa og at alle knappar vert knappa rett).

Så slo kaoset i mot meg.

 

Husbonden og eldstemann stod midt i ein heller komplisert hårklipp, alle kle låg strødd utover golvet og dei to snuppene låg fornøgde og padla rundt i badekaret.  "Herlighet!!! Er du klar over at....."-talen runga over heile badet. Ingen andre enn meg såg problemet! Vi hadde jo god tid, heile tre kvarter til vår disposisjon!!!! Husbonden tenkte tydelegvis ikkje på at det også tek tid å pakke bilen med ungar, gåver og kaker, lufte hunden og ikkje minst at husfrua sjølv skulle ordne seg... Her var det berre å brett opp armane og sette i gong med hardt og effektivt arbeid!

Småsnuppene vart raskt sjamponerte og innsåpa, eldstemann måtte tvangsdusje seg får å fjerne alle små hår, husbonden sprang rundt som ein gal og leita etter kleda (som skulle ha vore oppleitt det fyrste kvarteret før eg kom på badet...), medan eg sjølv sjonglerte alt det andre.

Rett før vi sprang ut gjennom dørene rakk eg å hoppe ut av joggebukse og ullskjorte, inn i finstasen, drog litt paste gjennom håret og sminka meg så fort eg berre kunne (takk og lov for eit Oprahshow som ein gong delte ut råd om korleis ein kan sminke seg pent på under et minutt!).

Korleis vi klarte å gjere entrè presis klokka fem i selskapet, er framleis eit under!!! Men der stod vi altså, tre reine og fine ungar, ein blid og uanfekta husbond og husfrua med raude roser i kinna og ei kake i kvar hand. UTRULEG!!!

Stressa???? Nei, langt ifrå!!!! Berre litt småsvett, hektisk og med puls langt over det anbefalte!

PS! Dei beroligande bileta er sjølvsagt tekne med av heilt opplagte grunnar....

(klikk på bileta så ser du kvar eg har lånt dei)