Kan eg få ein ballong-is, takk?

Heile laurdagen gjekk ungane rundt og masa om å få lage ballong-is. Ikkje ante eg kva dei prata om, og svara "ja", "nei", "slutt å mase" heile dagen. Ungane vart ikkje klokare på meg, ballongar var ikkje å oppdrive og pappaen i huset sa kategorisk NEI (han høyrde vel berre orda lage og is, og slo ein slutt i at dette sikkert kom til å ende opp i rot og griseri som han måtte rydde opp). Men utpå kvelden fann dei alstå to ballongar nederst i rotaskuffa på kjøkkenet (jada, eg har slike skuffer!), så no skulle det kokkelerast - trudde vi! Det viste seg heldigvis at det einaste dei skulle gjere var å fylle ballongane med vatn, knyte att og fryse dei til neste dag.

Søndag klipte dei opp sjølve ballongen og vart ståande att med to store iskuler. Desse ville dei knuse til småbitar, men fekk kvar si skål å sette dei i på altanen medan dei såg ferdig barne-TV. Og her såg sjølvsagt mor sitt snitt til nokre vakre bileter! Presenterer eit lite utval for dykk her, men de må vite at det ligg ca 100 til lagra på datamaskin.... Det er faktisk utruleg kor ei iskule endrar utsjånad berre den får lys frå ein anna vinkel og etterkvart som den smeltar. Nyt desse bileta!

Her kan ein vel få så mange slags assosiasjonar.....  

Små hender MÅ røre, berre MÅ røre!

Å drype, dryp, draup, har drope!

Desse bileta eignar seg sjølvsagt best i litt større format, men eit lite inntrykk får de i allefall!

Ikkje det at eg direkte gler meg til vinteren, men eg og eldstemann gler oss til å fotografere istappar! Vi vart litt inspirerte etter dette fototstuntet, og Johan har allereie sikta seg ut eit par-tre stadar der vi veit at største istappane i bygda heng.

No skal eg krype til køys og få meg ein velfortent kvil. Det har vore utfordrande å byrje på jobb att, men det er heldigvis snart helg (må leite etter det positive...). No ligg to sett med nystrokne skulekle, ein blå ransel, ein rosa ransel og to matbokser klar for morgondagen. På loftet ligg to skjønne, nybada med sommarfuglar i magen. Det er Ida sin aller fyrste skuledag, medan den erfarne storebroren skal ta til i 4. klasse. Dei største sommarfuglane romstrerer likevel i magen til mor.... Tvi, tvi!