...om å putte vaffelhjarter i adventskalendaren!

Vi har fått opp adventskalendaren og er såleis godt i gong med adventstida. Men eg er ikkje like flink som mange andre til å fylle spennande saker i kvar ei lomme. Eg er vel eigentleg av den formeining at når det er tre ungar i hus, så begrensar kalendargåvene seg sjølv. Ikkje tek eg meg råd til å fylle kalendaren med 72 flotte adventsgåver, og ikkje har eg fantasi eller tid til å vere kreativ og finne 72 ting som nesten ikkje kostar noko. Her i huset er ungane vorte vane med at det nokre dagar er tomt i lommene. Ikkje fordi dei absolutt ikkje skal få noko, men fordi eg gjerne har kjøpt noko til dei som kan vare ei stund. Slik var det med fyrste adventsgåva i år òg! Synest det er så kjekt når ungane sjølve ikkje forventar pakkar kvar dag før jul. Utruleg kjekt å sjå at så mange er flinke med slikt, ofte utan at det kostar ei krone, her gjer vi det heller litt enkelt.

Då ungane kom heim i dag, hang denne pakken og venta på adventskalendaren. Eg påstod hardnakka at eg hadde pakka inn vaflar, noko dei sjølvsagt protestert høglydt mot!  Gåva hadde eg tenkt ut lenge, og gleda meg til å gi den til ungane. Eg kom litt tidleg heim frå jobb  i dag og kosa meg med å pakke den inn.

Denne boka av Maria Parr, "Vaffelhjarte", er ei perle og ein juvel i boksamlinga. Den unge dama som har skrive boka bur i eit av dei sju prestegjelda eg ser frå altanen min (slikt var viktig å kunne seie før, må vite! Statusen auka dess fleire prestegjeld ein såg, for til sværare og høgare opp i terrenget budde dei). Boka er vel eigentleg skriven for born, men er akkurat like kjekk å lese for tenåringar, foreldre og besteforeldre. Denne boka skal vi kose oss med i adventstida. Eldstemann har høyrt den før, og sit og humrar litt før dei gode poenga kjem. Det er så vidt han klarer å la vere å røpe alt!

 

Ei kosleg helsing inne i boka høyrer sjølvsagt med! Tru det eller ei, men ungane protesterte ikkje då eg sa at denne kan vi kose oss med så lenge, at det ikkje er sikkert vi treng fleire adventsgåver! Vil forresten anbefale boka på det varmaste! Her får du deg mang ein latter og fantastiske historier sett med barneauge.

I morgon er det tomt i 2. desember-lomma på kalendaren vår, men det blir lesestund og fullt i sofakroken!