Syk pike...

Det skulle vere husbonden sin dag i dag. Eg og ungane skulle stå tidleg opp og bake rundstykker, medan far fekk sove. Vi skulle leite fram dei heimelaga korta og overraske han med kaffi og frukost på senga. Han skulle verte overstrøymande glad og fortelje ungane at han er den heldigaste pappaen i verda, og så skulle alle innta dobbeltsenga og kose vekk heile førmiddagen. Det vart ikkje slik.

 

Eit uvennleg magevirus sende meg rett til køys i går kveld, så no ligg eg åleine i dobbeltsenga og synest synd på meg sjølv. Dei to eldste ungane er i trygg forvaring hos besteforeldra (som forøvrig alltid kjem som reddande englar når foreldra ligg rett ut), og veslesnuppa har pappaen heilt for seg sjølv. Dei har sove på det rosa prinsesseromet i natt, mest for å begrense skadeomfanget og halde dei unna den umiddelbare smittefaren.

Planen var at heile familien skulle ut å gå tur i dag, og så rett heim og tilberede deilig pinnekjøt til middag. No ligg kjøtet i frysaren og veslesnuppa og pappaen er ute og trillar tur åleina. Eg kjenner meg litt betre enn eg var i natt, så kanskje eg kjem meg på beina i løpet av dagen.

Visste du forresten at jenta på biletet fekk 25 øre av Edward Munch som takk for at han fekk teikne henne?  Eg kjenner meg litt som henne i dag; sjuk, elendig og fullstendig uinteressert i livet utanfor soveromsveggane. Ho var heldig og fekk 25 øre, eg er heldig og har ein mann som passar på meg med tørre knekkebrød, cola og trøystande ord.

Trur eg skal opphalde meg ei stund til i isolatet og ta turen innom alle dei oppdaterte bloggane og legge att kommentarar. Må prøve å gjere det beste av situasjonen....

Får håpe dei fleste har eit betre søndag enn meg, og at fedre og bestefedre vert heidra i dei tusen heimar!

HA EIN STRÅLANDE SØNDAG!