Heimelaga vaniljesukker og vaniljesirup!

Eg og minstesnuppa har laga ekte, heimelaga vaniljesukker i dag!!!

Ein kan lage ekte vaniljesukker på mange måtar. Du kan ta vanleg sukker på eit glas og putte opp i vaniljestang! Snitt den, skrap ut frøa og bruk dei til ein dessert, til dømes! Når glaset har stått ei stund vil vaniljestanga sette god smak på sukkeret.

Ein annan variant er å lage vaniljesukker basert på melis. Det var slik eg gjorde det i dag. Ta ei vaniljestang og del den på langs. Skjær så stanga i bitar. Du skal ikkje ta ut frøa. Putt bitane i ei kjøkkenmaskin i lag med melis. Eg brukte:

Ca. 300-500 gram melis

To vaniljestenger

Stor kjøkkenmaskin

Litt mindre kjøkkenmaskin

Fyrst køyrde melis og vaniljestang i den store kjøkkenmaskina leeeenge. Så slo eg alt gjennom eit mjølsikt. Då sat eg att med “vaniljestangklumpane”, som du ser på biletet under:

Desse klumpane køyrde eg så i den litt mindre kjøkkenmaskina mi i lag med litt melis, så hadde eg det gjennom mjølsiktet ein gong til. Repeter denne prosessen to-tre gongar for å få mest mogleg ut av vaniljestanga. Bland til slutt vaniljesukkeret godt i ei skål og ha over plastfolie. Slik kan det godt stå ein dag eller to til smakane får sett seg. I morgon skal eg ha vaniljesukkeret på fine glas og så vert det kanskje julegåver!

Eg tenkte det var for gale å kaste dei herlege restane og laga like godt litt vaniljesirup! Gjenbruk er bra også i matverda!

Eg laga ein vaksen variant der eg brukte litt Captain Morgan-rom. Sirupen må koke til du ser at den tjuknar, men må ikkje vere så tjukk at du ikkje klarar å sile den.

Slå sirupen og glas og set kjøleg. Dette smakar nydeleg på is, i ein god kaffi, over varme bær og mykje, mykje meir!

Dette er fine, små julegåver som du kan gi til gode venninner! Det er så utruleg enkelt og så utruleg godt!!!