Eg har vunne ein premie!

Det er jammen ikkje ofte eg har vinnarlukke! Eg kan ta hundre tombolalodd og vinne ein Fox i trøstepremie. Lodd på bok er ikkje særleg betre det heller. Eg tømer lommeboka, skriv namna på alle ungane og til slutt på meg og Terje. Einaste trøysta er at eg støttar ei god sak og at pengane mine kjem godt med.

Brått og uventa, og som lyn frå klar himmel, ser det ut til at vinnarlukka mi snur! På barnehagen si julemesse vann eg 6 flotte vinglas, men grommaste premien kom i posten i går.

For ei tid tilbake la eg att ein kommentar på denne kreative bloggen. Solveig feira innlegg nr. 200 og lova å trekke ut ein vinnar blant alle som la att kommentar. Eg har ikkje tal på kor mange kommentarar eg har lagt at i slike "premieinnlegg", men aldri om eg har vunne!

I går dumpa denne pakken ned i postkassa mi. Den var liten, mjuk og lett. Det var ikkje til å legge skjul på at eg øyna eit håp om at det var noko heimelaga - Solveig strikkar nemleg dei flottaste kreasjonar!

Det koslege kortet gjorde meg heilt sikker på at Solveig hadde laga noko til meg...

 

Har du forresten tenkt over kor spennande det er å opne noko som er pakka inn i silkepapir??? Det glatte, fine papiret som knitrar så fint når du tek i det. Solveig bur i Kristiansand, men er opprinneleg frå same kommune som meg. For mange år sidan vanka vi litt i same miljø og har mange felles bekjente - difor er det ekstra kjekt å få pakke frå henne!

Solveig hadde hekla eit sjal til meg!!! Ikkje forstår eg korleis det går ann... Ida stilte villeg opp som modell og syntest det var deilig å ha det lune, gode skjerfet i halsen.

Solveig skreiv på kortet at ho håpte eg likte det og at fargen fall i smak! JA, SOLVEIG - skjerfet var alldeles nydeleg og fargane var akkurat så jordnære og lune som eg likar dei!

For ei som ikkje kan å hekle, så er dette reine kunstverket!

 

Tusen takk, kjære Solveig! Skjerfet har ikkje vore i min heim i meir enn eit døgn, men er allereie godt brukt! I går hausta det beundring blant klubbdamene, og i dag heldt det meg god og varm på jobb.

Eg veit ikkje kor eg skal få takka deg nok for denne flotte gåva, eg set umåteleg stor pris på å ha vunne dette skjerfet! Solveig sin blogg er verkeleg verdt eit besøk, så får du sjå alt det andre denne dama lagar!

I morgon skal koret mitt vere med på å synge til to flotte, musikalske brødre som har vunne Kongens fortenestemedalje i gull - og skjerfet skal sjølvsagt vere med!

Tusen takk - igjen!