... om å gjere sine gleder enkle.

Det har vore lange og late dagar her i huset. Ungane har stått i fokus. Dei lyse og lette kveldane gjer det vanskeleg å rope dei inn til leggetid. Kreativiteten har bobla og mange snikkarprosjekt har vorte avslutta på låven.

Det har vore dagar til ettertanke. Dagar fylte av glede over å ha så mykje å vere takksame for.  Samstundes har tankane våre vore fylt av sorg og smerte over dei som har mista sine nære og kjære denne påska. Tragiske ulukker har råka lokalmiljøa nær oss.

Heilt sidan eg starta å blogge, har eg hatt eit håp om å formidle at lukka og livsgleda ligg i kvardagen. Augneblink som passerer utan at vi legg det til merke. Små glimt av noko stort, som ikkje vert fanga opp fordi vi har det for travelt.

Ei lita barnehand på oppdagingsferd. Vi har så mykje å lære av borna. Med eit ope blikk møter dei omgjevnadane sine. Undrar seg. Smiler. Sansar. Og undrar seg litt til.

Mykje av det vi vaksne går forbi, kan ungane stanse opp og finne interessant. Leike med. Smake på. Gruble på.

Kor mange stjerner er det på himmelen, mamma? Kvar kjem regnet i frå, pappa?

Eit hav av spørsmål.

Eit hav av moglegheiter.

Eit hav av glede.

Å sjå det vakre i det enkle .

Å sjå det store i det små.

Det du leitar etter, dei svara du søkjer, ligg kanskje der du aller  minst ventar det.

Ikkje ver redd for å ta i eit tak.

Ha med deg hjartet ditt i alt du gjer.

Sjå det vakre i det ubetydelege....

...  kanskje er det verkeleg det som til sjuande og sist betyr aller mest?

 

Gi ei handsrekking når nokon treng det.

Våg deg ut på nye og ukjende stiar. Sjølv om andre før deg har snudd.

Vis omsorg og kjærleik. Og mykje av det! Dyrk det!

Ein kan aldri få nok -

ein kan aldri gi for mykje.

Om vi alle klarer å finne glede i alt som er rundt oss, vil vi få ein rikare kvardag. Om vi berre klarer å sjå at lukka ligg rett framfor oss!  Det handlar om å gripe kvardagsaugneblinka og verdsette dei. Gjennom eit langt liv er det kvardager vi har mest av. Vi veit aldri kva som møter oss bak neste sving, gjer difor alle augneblink betydningsfulle.

 

Hugs å sjå det store i det små!