tirsdag 23. desember 2008

Det skjedde i dei dagar...

 Det skjedde i dei dagar at det gjekk ut befaling frå keiser Augustus om at heile verda skulle skrivast inn i manntal...

021

...og medan dei var der, kom tida då ho skulle føde. Og ho fødde sin son, den fyrstefødte, sveipte han og la han i ei krubbe. For dei fann ikkje husrom nokon stad.

013

... men engelen sa til dei: «Frykt ikke! Sjå, eg forkynner dykk ei stor glede, ei glede for heile folket:  I dag er det fødtd dykk ein frelser i Davids by; han er Messias, Herren...

018

... og dette skal de ha til teikn: De skal finne eit barn som er sveipt og ligg i ei krubbe.»

017 

... men Maria tok vare på alt som vart sagt, og grunna på det i hjartet sitt. 

011

Gjeterne drog tilbake. De lova og prisa Gud for alt dei hadde høyrt og sett; alt viar slik som det hadde vorte dei fortalt.

Julekrubba mi er komen på plass, og det er det berre å vente på jula! Denne flotte krubba kjøpte foreldra mine til meg ein gong dei var på ferie i Egypt. Den har vore kvar jul sidan, det vert ikkje jul utan! Det skjønnaste med julekrubba er det vesle Jesusbarnet i krubba, og engelen som heng over dei andre.

Det er ei eiga ro over slike kveldar, når ein er ferdige med gjeremåla og kan setje seg ned og slappe av. I morgon er det veslejulaftan - då er det siste innspurt, bloggdamer! Rydd, vask og pynt - men finn òg tid til kos og hygge.... 

søndag 21. desember 2008

Peparkakebakarar!!!

Det var den store peparkakebake-dagen i dag! I fjor vart heile sulamitten mislykka, så i år gjorde vi det enkelt og greit og kjøpte Møllerens ferdige deig. Den var slettes ikkje verst! Som vanleg er det mange ivrige hender kring bordet når det skal bakast og smakast. I perioder var det forresten mest smaking og minst baking...

040 037

Her er favorittformene klare til bruk!

045

Frøken midtimellom er røynd og har gjort dette før.........

047

.... medan minstesnuppa skal prøve peparkakebaking for aller fyrste gong!

048 049 050

Når en pepperkakebaker baker pepperkakekaker tar han først en stekegryte og en kilo margarin. Oppi gryta smelter smøret,  og det neste han må gjøre er å røre sammen smøret og en kilo med farin.                                                       

Og mens smør og sukker skummer tar han åtte eggeplommer
som han rører rundt i gryta med en kilo hvetmjøl
og til slutt i gryta slepper han en liten teskje pepper
og så rører man det rundt og slenger deigen på ei fjøl!

051 052 055

Hmmmm, skal tru om mamma har litt deig til meg??? Sjå der ja, det er best å stappe det i munnen med eingong så ein ikkje vert oppdaga... Ha, ha, mamma - lurte deg igjen!!!

053 054

Storeungane er ikkje hakket betre... Her må det smakast! Peparkakedeig er jammen godt!!!

058

"Så tag mit hjerte i dine hænder,

men tag det varsomt og tag det blidt,

det røde hjerte - nu er det dit."

- Tove Ditlevsen -

060

Mamma + pappa = sant!!!

059 

"Bevar ditt hjerte framfor alt du bevarer, for livet går ut fra det." - Bibelen -

Siste biletet får vere til ære for mannen i huset, som i skrivande stund ligg på alle fire og demonterer dusjkabinettet slik at eg får gjere julereint også der!

Ha ein stormfull søndagskveld - her lettar snart huset!

Utmerking ein tidleg morgontime...

Eg har lenge hatt ei trufast dame som har besøkt bloggen min. Ho legg alltid att koslege kommentarar som eg set utruleg stor pris på! Denne flotte dama heiter Synne og er svensk/norsk/sunnmørsk - ein fantastiskt kombinasjon! Bloggen hennar fortel om liv og levnad på garden der ho bur, og det er alltid like kjekt å stikke innom på bloggbesøk.

Kjære Synne, denne utmerkinga er til deg:

award3  

Tusen takk for den gode bloggvenskapen vi har utvikla, takk for rause og hjartlege kommentarar og for at du deler kvardagslivet ditt med meg! Det aller mest utrulege er at Synne bur på Digernes gard, og Digernes er faktisk etternamnet mitt!!!! Ho bur sjølvsagt på ein annan kant av landet, og det heiter Digernes fleire stadar - men det er så artig med slike samantreff!  No ynskjer eg deg og dine ei fantastisk julefeiring, Synne!

lørdag 20. desember 2008

Kunst frå barnehand...

Lat meg få introdusere deg for den minste kunstnaren i familien! Ho er så glad i å teikne, og aller helst med tusj - noko som ikkje er det aller luraste.... I dag gjekk ho igong med nye prosjekt, innsatsviljen var det ingenting å seie på!

 031

Å vere kunstnar byd på praktiske utfordringar for små barnehender, som for eksempel å sette toppa på tusjen. Ein må prøve seg fram så godt ein kan....

032

.... men kanskje ikkje slik???

028

Sånn, ja - slik skal det gjerast!!!  Eit triumferande sigerssmil stadfestar stoltheita. Sjå det herleg, skitne barneandletet! I dag var ho så ivrig at ho hoppa rett frå frukostbordet og til teiknebordet, framleis med makrell i tomat- restar på kinna! Slikt kan ikkje in kunstnar bry seg om...

034 035

Det er ikkje mykje ein klarer å uttrykkje munnleg når ein er 1 1/2 år, men her klarte vi å forstå at det var ein "tokketokk" ho teikna (båt). Det blå var sjølvsagt bølgene.

036

Til høgre i biletet teikna ho dette vesenet. Eit julemammahjerte ser sjølvsagt at dette er ein engel! Du ser vel vengane??? Dei raude flekkane øverst i biletet er makrell i tomat, for englar også et vel det???

Like sjarmert vart eg ikkje då eg kom heim frå møte ein kveld. Rett bak enden på sofaen openberra det seg eit kreativt veggmåleri....

010 

Her hadde altså vesle Sina vore på ferde med tusjane sine igjen.... Mor i huset vart ikkje særleg begeistra, då eg slettest ikkje likte å få rota til dei nyvaska stoveveggane. Sina meinte nok at dette var det perfekte lerret for eit aldri så lite veggmåleri, og dermed vart det slik! Far i huset gliste stolt og meinte det var stas å ha kunst som ingen andre har maken til! Då den vesle kunstnaren triumferande sprang inn i stova neste morgon og viste meg praktverket, smelta eg sjølvsagt.... Men vekk skal det! Her er det berre å leite fram skuremiddel og setje i gong... Eg er diverre stygt redd for at eg kan vente meg meir kunst frå dette hald, på både tenkjelege og utenkjelege stadar - sukk......

Ha ein strålande laurdag - her vert det stadig meir jul!

fredag 19. desember 2008

Tusen, millionar takk!!!

Oj, oj, oj for ein dag det har vore!!! Det er nesten så ein skulle tru at julekvelden kom på forskot i år! Etter å ha vore på kommunestyremøte i 12 timar i går, sove godt - men litt for lite i natt, så kom eg på jobb i dag tidleg og skulle gjere meg klar til å sende elevane heim til velfortent juleferie. Synet som møtte meg då eg kom inn på kontoret mitt, rørte både lærarhjartet, god ven-hjartet og kollegahjartet. Framføre meg var det pakkar, blomehelsingar og vakre ord på vakre kort. For ein fantastisk arbeidsplass eg har! For nokre eineståande kollegaer eg har, for ikkje å gløyme dei flotte ungdomane eg har gleda av å tilbringe kvardagen mine ilag med.

035 

Alt pakka inn med omhug,  kjærleik og gleda av å gi. Eg vart så rørt.... I juleforventninga si ånd ventar eg sjølvsagt med å opne dei til julafta.....- trur eg!

049 050

Juleblomar frå takksame foreldre og frå rektor... Eg har ikkje ord!  Tusen, tusen takk...

Og som om ikkje alt dette var nok, var det pakke på trappa då eg kom heim (eg bur så grisgrendt at dersom posten ikkje får plass i postkassa, berre legg dei den i ein pose på trappa!). Ein rask kik på avsendar gjorde at eg brått kom på at eg for litt sidan hadde vunne ein premie frå mi gode venninne Line med bloggen Kvardagsliv i Storemyra. Eg opna konvolutten, og augene vart store då eg såg alt som var der:

001 005

Line, du er gal!!!!!

Heile fem pakkar var det i konvolutten, i tillegg til kosleg heimelaga kort og julehelsing med bilete av dei skjønne ungane hennar. Sidan både eg og ungane er av den litt utolmodige sorten, måtte vi pakka opp desse gåvene i kveld ("mamma treng nemleg eit innlegg til bloggen...", sa Johan...).  Sjå berre kva eg fekk!

007 008

Ei nydeleg lyslenkje.......

009 019

Fire, nydlege englevingar som vi allereie har hengt opp både her og der...

017

Måtte sjølvsagt ha eit par vingar på soverommet....

024 026

Nokre nydlege oppheng med perler var også i pakken. Var litt artig å bruke den eine til englekropp!!!

027 030 031

Ein pakke nydlege servietter med julepynta fyrstikkøskje.....

032

Kjære Line; tusen takk for alle dei flotte gåvene! Dette var alldeles uventa, men svært, svært hyggeleg...... Du er ein engel, kjære du....!!!!!!

No har eg takka og bukka til alle som har gjort dette til ein strålande dag!

Ha ein flott fredagskveld ! Eg skal på kino ilag med ei venninne!

 

mandag 15. desember 2008

Kom gjerne innom på ein kopp kaffi!

For ti år sidan forelska eg meg i eit juleservise frå Porsgrund. Det kosta ei lita formue, så eg måtte kjøpe litt no og litt då. Serviset heiter "Engleservise" og eg meiner det er designa av Lise Skjåk Bræk.

022 028

Dei smålubne englane svevar så vakkert over porselenet.

027 024  

Vakre detaljar frå asjetten. For to år sidan fann eg ut, til mi store sorg, at serviset er gått ut produksjon. Det fine med det var at alle delane var på salg til halv pris! Då fekk eg supplert litt til middagsserviset òg!

030 032

Serviset høyrer naturleg heime på kaffibordet og middagsbordet heile jula. Eg er ikkje av dei som stuar vekk det finaste porselenet - det kan ikkje glede verken meg eller andre når det står vekkgøymt i skapet!

035

Herre Friele får kvile i jula - skikkeleg kaffi er påkrevd når det er høgtid! Tante Bruun på Moa sel den nydlegaste kaffi, og vi har allereie tømt ein pakke. Spørst om vi ikkje må ta turen utover og kjøpe litt meir!

Så om du bankar på døra mi i jula, kan eg, Tante Bruun og Porsgrund  love deg englekaffi og julestemning!!!

Velkomen skal du vere!!!